Gisuportahan sa mga mayor sa nagkalain-laing munisipyo sa probinsya sa Davao del Norte sa gihandum nga pag-usab sa ngalan sa Municipality of San Isidro ngadto sa Municipality of Sawata atol sa panagtigom niadtong Abril 11, 2026.
Ang maong panagtigom gipangunahan ni mayor Silvano B. Gaje sa San Isidro uban nila ni mayor Edgardo L. Timbol, sa Kapalong, mayor Roland S. Dejesica sa Santo Tomas, mayor Margarita Y. Rubinos sa Braulio E. Dujali, mayor Jonnie A. Libayao sa Talaingod, mayor Jorjan B. Federiso sa New Corella, mayor Atty. Rosario R. Dayaday sa Asuncion, ug mayor Leonidas R. Bahague, sa Carmen kinsa Presidente sa League of Municipalities of the Philippines sa Davao del Norte.
Tumong sa panagtigom ang pagpadayag sa ilang suporta sa plebisito nga gipangunahan sa Commission on Elections (COMELEC) niadtong adlawa, nga naghatag higayon sa katawhan sa pagpili kung aprobahan ba ang pag-usab sa ngalan sa ilang lungsod.
Sumala sa mga lider, ang hiniusang suporta nagpakita sa lig-on nga panaghiusa sa probinsya ug sa nagkahiusa nga tumong nga mapalambo ang identidad, kauswagan, ug kalamboan sa matag lungsod sa Davao del Norte, diin malampuson ang katawhan sanglit hingpit na kini nga nahimong Municipality of Sawata nga adunay barangay Poblacion.
Photo Courtesy : kapalong Info center
