Nabungkag sa kapulisan ang usa ka lapad nga illegal mining operation sa Cantilan, Surigao del Sur, nga misangpot sa pag-aresto sa napulo ka mga indibidwal lakip ang siyam ka Chinese nationals ug usa ka Pilipino niadtong nakalabay nga adlaw.
Sa maong operasyon, nasakmit ang nagkantidad og kapin ₱50.5 milyon nga mga heavy equipment nga giingong gigamit sa ilegal nga pagpangmina, nga nagpakita sa kadako sa iligal nga kalihokan sa lugar.
Gipangunahan ang maong operasyon sa Police Regional Office 13 pinaagi sa Regional Intelligence Division 13, uban ang suporta sa Department of Environment and Natural Resources ug uban pang ahensya sa gobyerno nga nagtinabangay sa pagpanalipod sa kinaiyahan.
Subay sa imbestigasyon, paga-atubangon sa mga nadakpan ang kasong paglapas sa Philippine Mining Act of 1995 ug uban pang may kalabutan nga balaod. Sa pagkakaron, anaa na sila sa kustodiya sa Cantilan Municipal Police Station samtang nagpadayon ang legal nga proseso.
Photo courtesy: Police Regional Office 13
