Kasamtangang gitrabaho sa kagamhanan ang pag-export sa mga manga ug pinya sa Pilipinas ngadto sa Estados Unidos isip kabahin sa paningkamot nga mapalapdan ang agrikultural nga patigayon.
Matod ni Bureau of Plant Industry (BPI) director Gerald Glenn Panganiban nga nakigtambayayong ang gobyerno sa ilang mga kauban sa Amerika aron masiguro nga ang mga export sa pinya motuman sa gikinahanglang kalidad nga pamantayan.
Dugang ni Panganiban nga ang pag-eksport sa pinya paingon sa US gitugotan na kaniadto ug kinahanglan na lang nga magkasabot nga mosunod sa gi-update nga phytosanitary measures.
Lakip sa maong mga lakang ang preclearance inspection ug onsite irradiation treatment.
Ang phytosanitary systems gituyo aron mapugngan ang pagkaylap sa mga sakit sa tanom, samtang ang irradiation mao ang proseso sa pagbutang sa ani ilawom sa kontroladong radiation aron mapapas ang bakterya ug uban pang mga mikroorganismo.
Nakigtagbo ang BPI sa mga opisyal gikan sa US Department of Agriculture–Animal and Plant Health Inspection Service (USDA-APHIS) aron mapalambo ang kooperasyon sa kahimsog sa tanom ug pag-abli sa merkado.
Usa sa mga gihisgutan mao ang pagpasayon ug pagpasiguro sa luwas ug episyenteng patigayon tali sa duha ka nasud, ilabi na alang sa lokal nga mga mangga ug pinya.
Photo Courtesy:Triowin
