Nagpatuman og mga cost-saving protocols ang Provincial Government of Surigao del Sur isip tubag sa padayon nga pagsaka sa presyo sa krudo ug aron mapagaan ang epekto sa energy crisis.
Sumala kang Provincial Administrator John Vincent Pimentel, naaprobahan na niadtong Martes ang mga giya nga naglatid sa mga lakang aron mapaminusan ang epekto sa kasamtangang krisis sa krudo.
Gipasabot usab niya nga ang mga austerity measures komprehensibo ug naglangkob sa tanang opisyal ug opisina sa probinsyal nga gobyerno.
Ilalom sa bag-ong guidelines, limitado na lamang ang official travel sa mga importante nga kalihokan nga dili mahimo pinaagi sa virtual meetings o electronic communication. Ang dili makatarunganong biyahe ug ang sobra nga extension sa travel dili na tugutan.
Apil sa gitugotan nga biyahe ang onsite evaluations, campaign activities, ug mandatory accreditation, apan limitado lamang ang mga personnel. Ang Provincial Human Resources Office maoy motan-aw sa mga travel requests matag unang Miyerkules sa bulan, samtang ang Provincial Accounting Office magmonitor sa gidugayon sa biyahe.
Gipugngan usab ang benchmarking ug study tours gawas sa probinsya gawas kung mapamatud-an nga importante kini alang sa resulta sa mga programa o polisiya.
Kinahanglan usab nga makakuha og pagtugot daan gikan sa Office of the Governor ang tanang aktibidad, diin hatagan og prayoridad ang mga essential nga transaksyon ug direktang implementasyon sa mga programa. Ang mga miting, seminar, ug training kinahanglan ipahigayon sulod sa probinsya kutob sa mahimo aron makunhuran ang gasto sa biyahe.
Giawhag usab ang paggamit sa virtual participation aron malikayan ang dili kinahanglan nga pagbiyahe, samtang ipatuman ang trip consolidation ug paggamit sa pinakaduol ug dili kaayo trapik nga rota sa mga drayber aron malikayan ang delays.
Bisan pa niini, gipatin-aw sa guidelines nga magpadayon sa normal nga operasyon ang mga kritikal nga opisina sama sa mga government hospital, provincial jail, Provincial Disaster Risk Reduction and Management Office, ug ang provincial supply chain aron masiguro ang walay hunong nga paghatag og serbisyo sa publiko.
Giingon sa panggamhanan nga ang mga energy protocols dili dapat makaapekto o makababag sa paghatag sa ilang mandato nga serbisyo publiko.
Sa miaging bulan, nagpagawas usab si Governor Johnny Pimentel og Memorandum Order No. 28 nga nagpatuman og compressed workweek matag ikaduhang ug ikaupat nga semana sa bulan, diin ang mga empleyado motrabaho gikan alas-7 sa buntag hangtod alas-6 sa gabii.
Photo Courtesy: Province of Surigao del Sur
