Opisyal nang gipatuman kagahapong adlawa sa kagamhanan sa Dakbayan sa Sugbu ang four-day work week, ubos sa Executive Order No. 069 nga gipirmahan ni Cebu City Mayor Nestor Archival.
Sumala sa bag-ong palisiya, ang oras sa trabaho sa city hall magsugod gikan alas 8:00 sa buntag hangtod alas 6:30 sa gabii, Lunes hangtod Huwebes.
Apan, ang maong setup ipatuman una sa pilot basis hangtod sa Abril 17 aron masuta kung epektibo ba kini, ilabina sa pagpaubos sa konsumo sa kuryente ug operational costs sa dakbayan.
Kung mapamatud-an nga epektibo ang maong lakang, posible kini nga ipadayon sa kagamhanan.
Giklaro sab sa kagamhanan nga dili tanang buhatan maapil sa maong kausaban. Ang mga adunay essential ug frontline services sama sa health ug medical services, emergency response, solid waste management, sanitation, ug traffic enforcement, magpadayon sa ilang naandang schedule o mosunod sa angay nga shifting arrangement aron dili maputol ang serbisyo sa publiko.
Sa laing bahin, kanselado na ang tanang flexible work arrangements sa ubang kawani, ug gikinahanglan silang mosunod sa bag-ong oras sa trabaho.
Gidasig usab ang mga barangay sa dakbayan nga mosunod sa susamang work arrangement.
