Plano sa Department of Labor and Employment (DOLE) Region 9 nga i-roll out ang “Benteng Bigas Program” alang sa mga minimum wage earners sa Zamboanga Peninsula sa umaabot Mayo 1 o Labor Day.
Matod ni Atty. Julius Banzon, Senior Labor and Employment Officer sa DOLE Region 9, sa nakalabayng tuig naka roll out na ang DOLE sa Benteng Bigas Program ug karong tuiga himoon nila kini atol sa adlaw sa mga mamumuo.
Niya pa, base sa naunang implementasyon sa programa sa Zamboanga City, matag benepisyaryo makapalit hangtod 10 kilos nga bugas matag bulan sa subsidized nga presyo.
Nasuta usab nga human sa pilot implementation, padayong ginapalapdan ang programa ngadto sa ubang probinsya sa Zamboanga Peninsula aron mas daghang trabahante ang makabenepisyo.
Giingon ni Atty. Banzon ang inisyatiba ginabuhat uban ang Department of Agriculture ug National Food Authority isip tabang sa mga minimum wage earners nga naapektuhan sa pagsaka sa presyo sa mga palaliton karong panahona.
