Mokabat sa 508 ka mga mananagat sa lalawigan sa Zamboanga del Sur ang nakapahimulos sa insurance program sa Philippine Crop Insurance Corporation (PCIC) Region 9, nga naghatag og proteksyon sa ilang panginabuhian batok sa posibleng kalamidad ug kadaot.
Sumala ni Isagani Templanza III, Insurance Underwriter I sa PCIC 9, ang maong inisyatiba kabahin sa padayon nga paningkamot sa ahensya sa pagpalig-on sa seguridad sa kita sa mga fisherfolk.
Pinaagi sa insurance coverage, masiguro nga adunay madawat nga pinansyal nga tabang ang mga benepisyaryo kon adunay kadaot o pagkawala sa ilang panginabuhian sama sa mga sakayan, pukot, ug uban pang kagamitan.
Gipasiugda niya nga ang programa bukas alang sa dugang pang mga mangingisda nga gustong magpalista aron mapanalipdan ang ilang kita ug masiguro ang kalig-on sa ilang panginabuhi.
Padayon usab ang ahensya sa pag-awhag sa mga lokal nga panggamhanan ug organisasyon sa sektor sa pangisda nga suportahan ang maong programa aron mas daghan pa ang makabenepisyo niini.
