Gilunsad ug gipahigayon sa Department of Trade and Industry (DTI) – Sarangani ang usa ka masusing operasyon sa pagmonitor sa presyo ug suplay sa mga nag-unang palitonon didto sa lungsod sa Alabel, Sarangani Province niadtong nakalabay nga adlaw.
Pinaagi sa Consumer Protection Division (CPD), gilibot ug gisusi sa maong ahensya ang kinatibuk-ang napulog-lima (15) ka mga establisyemento, lakip na ang lima ka tindahan sa bugas, unom ka mga grocery stores, ug upat ka mga hardware centers aron siguruhon nga walay mahitabong pagpahimus sa presyo.
Kini nga lakang nagtumong sa pagpalig-on sa proteksyon sa mga konsumidor ug pag-inspeksyon kon nagsunod ba ang mga negosyante sa gitakdang presyo sa mga nag unang kinahanglanon (BNPC), produktong agrikultural, kagamitang medikal, ug mga materyales sa konstruksyon.
Sa gihimong pagsusi, namatikdan nga nagpabiling lig-on ug stable ang presyo sa kadaghanan sa mga nag-unang palitonon, bisan pa man sa mga hagit sa ekonomiya. Apan, nakita sa CPD nga adunay pagsaka sa retail price sa pipila ka materyales sa konstruksyon sama sa semento, lansang, ug mga kabilya.
Bisan pa niini, gipasalig sa DTI nga igo ug abunda ang suplay sa tibuok Alabel tungod kay padayon ang regular nga pag-abot sa mga delivery gikan sa mga suppliers ug wala may natala nga bisan unsang pagkalangan o kanihit sa stocks.
Tungod niini, gipahibalo sa ahensya nga kontrolado ug hapsay ang kahimtang sa merkado, samtang sila padayong nagmonitor ug nagbantay aron ipatuman ang mga balaod sa patas nga pamatigayon alang sa kaayohan sa tanang katawhan.
