Nagpahigayon na og hugot nga pagpangandam ang kapulisan sa Nabunturan alang sa umaabot nga selebrasyon sa Semana Santa. Kini sumala pa sa gipadayag ni Police Lieutenant Colonel Gomersendo L. Diwata II, Chief of Police sa Nabunturan Municipal Police Station (MPS).
Sa pakighinabi sa Juander Radyo Nabunturan News Team, gibutyag ni PLTCOL Diwata nga gipahugtan na sa ilang buhatan ang seguridad sa tibuok lungsod aron maseguro ang kalinaw ug kahapsay sa kasaulugan. Lakip sa ilang gihimong lakang ang pagdeploy og dugang kapulisan, diin 10 ka personnel gikan sa regional headquarters ang gipadala aron motabang sa pagbantay sa publiko ug mga lugar nga daghan og tawo.
Gipasiugda usab niya ang importansya sa kooperasyon sa komunidad, ug gi-awhag ang publiko nga ireport dayon sa kapulisan ang bisan unsang kahina-hinalang kalihokan aron malikayan ang posibleng insidente.
Samtang nagkaduol ang Semana Santa, nagpasalig ang Nabunturan MPS nga andam silang moatubang sa bisan unsang sitwasyon aron maseguro ang malinawon, hapsay, ug luwas nga selebrasyon alang sa tanang residente ug bisita.
