Padayon nga gipalig-on ang disiplina ug responsableng pagpanag-iya sa armas ang kapulisan, sa Lanao del Norte human nga gipahigayon ang License to Own and Possess Firearms (LTOPF) ug Firearms Registration One-Stop Shop niadtong nakalabay nga adlaw.
Gipahigayon ang maong kalihokan sa Old Conference Room sa Camp Major Eduardo J. Gallego sa Brgy. Pigcarangan, diin gitumong ang pagserbisyo sa mga personnel sa Philippine National Police (PNP) sa probinsya.
Ang inisyatibo gipangunahan sa Lanao del Norte Police Provincial Office (LDN PPO) ubos sa liderato ni PCOL Leo De Leon Sua, Acting Provincial Director, uban sa pakigtambayayong sa Regional Civil Security Unit (RCSU).
Tumong sa programa ang paghatag og mas paspas, episyente, ug kombinyente nga proseso sa pagparehistro sa armas pinaagi sa usa ka one-stop shop nga sistema, diin ang tanang kinahanglanon alang sa LTOPF mahimong matuman sa usa lamang ka lugar.
Sumala sa kapulisan, ang maong lakang dili lamang nagpasayon sa dokumentasyon kondili nagpalig-on usab sa kahinungdanon sa responsableng pagdala, paggamit, ug pagpanag-iya sa armas taliwala sa ilang han-ay.
Gipasabot usab nga ang hapsay ug legal nga pagparehistro sa armas maoy usa sa mga yawe aron malikayan ang sayop nga paggamit niini ug mapadayon ang kalinaw ug kahapsay sa komunidad.
