Gipasabot ni Atty. Vermin Quimco, usa ka batikang abogado sa Iligan City, ang kalabot sa mga detalye sa kamahinungdanon sa hustong pagsabot sa konsepto sa self-defense.
Kini atol sa esklusibong pakighinabi sa Juander Radyo News Team. Matod ni Atty. Quimco, dili tanang pagpanalipod matawag dayon nga self-defense, kundili kinahanglan kining adunay saktong basihan ug kondisyon pinasikad sa balaod aron kini mailhan nga legal.
Giingon usab niya nga ang nag-unang tahas sa mga kapulisan mao ang pagpanalipod sa kinabuhi sa matag katawhan, apan sa pipila ka sitwasyon, nga makapahigayon sila og operasyon mahimong maka-kutlo sa kinabuhi, kung kini klarong gikinahanglan ug masulod sa kahulugan sa self-defense.
Dugang pa, gipasabot ni Quimco nga bisan ang ordinaryong sibilyan adunay katungod sa pagpanalipod sa kaugalingon, basta kini buhaton sumala sa giya sa balaod, bisan pa man og moresulta kini sa pagkawala sa kinabuhi sa laing tawo.
Sa katapusan, gibutyag ni Atty. Quimco nga ang tanang insidente ug krimen adunay tukmang proseso ug legal nga lakang, ug gidasig ang publiko nga masabtan ang balaod aron malikayan ang paglapas niini.
