Nanguna ang probinsiya sa Surigao del Sur sa kinatibuk-ang tourist arrivals sa Caraga Region niadtong 2025, sumala sa pinakabag-ong datos gikan sa Provincial Tourism Office.
Base sa report, mokabat sa 60 porsyento sa kinatibuk-ang ihap sa mga turista sa rehiyon ang mibisita sa nagkadaiyang destinasyon sa probinsiya. Sa bahin sa same-day arrivals, Surigao del Sur gihapon ang nanguna pinaagi sa 40 porsyento nga share nga natala sa miaging tuig.
Gipasabot sa buhatan sa turismo nga ang maong kalampusan resulta sa epektibong mga estratehiya nga gipatuman sa provincial government.
Matud pa, ang mga numero dili lamang nagpakita sa dakong kontribusyon sa probinsiya sa paglambo sa turismo sa rehiyon, apan nagpamatuod usab nga ang Surigao del Sur nahimong usa sa nag-unang tourism powerhouse sa Caraga.
Gikan Hulyo 2025 hangtud Pebrero 2026, mas gipakusgan pa sa lokal nga panggamhanan ang tourism sector pinaagi sa mga strategic partnerships ug kapin sa 100 ka capability-building programs, lakip na ang reorganisasyon sa mga tourism councils sa nagkalain-laing lungsod.
Dugang pa, napili ang Provincial Tourism Officer isip kabahin sa liderato sa Association of Tourism Officers of the Philippines atol sa National Convention niadtong Oktubre 5, 2025 sa Baguio City—usa ka higayon nga naghatag og mas dakong pag-ila sa probinsiya sa national tourism landscape.
Padayon usab nga nagpalapad ang probinsiya sa iyang mga atraksyon pinaagi sa pag-ila sa bag-ong destinasyon, pagsuporta sa mga dagkong pista, ug pagpatuman sa sustainable ug community-based tourism initiatives.
Tungod niini, mikabat sa 378,000 ang tourist arrivals sa probinsiya niadtong 2025, samtang milapas sa 2 milyon ang same-day visits sa maong tuig.
Sa kasamtangan, misaka na sa 54 gikan sa 20 ang tourism enterprises sa probinsiya nga accredited sa Department of Tourism (DOT).
Samtang nagpadayon ang pagsaka sa interes sa turismo, gibutyag sa Provincial Tourism Office nga adunay mga grupo gikan sa Manila ug Cavite nga nagpakita og interes sa ilang planong Mindanao tour, lakip na ang pagbisita sa Surigao del Sur.
Photo Courtesy: Tropadvisor
