Andam ang Department of Education (DepEd) Caraga sa bisan unsang koordinasyon nga pagahimoon sa Philippine National Police (PNP) aron mapugngan ang paglambigit sa pipila ka mga magtutudlo sa gidili nga druga dinhi sa rehiyon sa Caraga.
Atol sa pakighinabi ning sibyahan kang Pedro Tecson, ang tigpamaba sa DepEd Caraga, nga nindot ang maong lakang sa PNP tungod kay dako kini og tabang aron malikayan ang susamang mga insidente sa umaabot.
Nahimong sentro sa hisgotanan ang maong isyu human nasikop kaniadtong Marso 20, 2026 ang usa ka District 1 School Supervisor o Principal III didto sa lungsod sa Tagbina, Surigao del Sur tungod sa kalambigitan niini sa illegal nga druga.
Naningkamot karon ang DepEd Caraga nga plantsahon ug hatagan og dinalian nga pagtagad ang maong problema aron masiguro nga dili na kini masubli pa sa han-ay sa mga magtutudlo.
Dugang pa, gipasalig sa maong buhatan nga andam silang makigbisog batok sa illegal nga druga aron mapanalipdan ang integridad sa sektor sa edukasyon sa tibuok rehiyon.
