Gipahigayon sa Provincial Peace and Order Council (PPOC) ang 1st Quarter Meeting sa probinsyal nga panggamhanan sa Davao del Norte niadtong nakalabay nga adlaw.
Nagkatigom sa maong miting ang mga local chief executives, mga ahensya sa kapulisan, ug mga opisyal sa probinsya aron hisgutan ang nag-unang mga isyu sa kalinaw ug kahapsay sa tibuok Davao del Norte.
Atol sa miting, gihisgutan usab ni Gobernador Edwin Jubahib ang nagkataas nga kabalaka sa suplay sa krudo ug gihatagan og gibug-aton ang panginahanglan nga mag-andam og reserbang diesel ug gasolina ang tanang Local Government Units (LGUs).
Sumala pa, aron masiguro ang padayon nga suplay sa krudo sa probinsya, gipadayag usab ni Jubahib ang iyang inisyatibo nga makigsabot sa gobyerno sa Malaysia, pinaagi sa Petronas aron mahimong suplayer sa petroleum products sa Davao del Norte.
Matod niya, posibleng makaabot og hangtod 44 milyones ka litro ang matag delivery sa krudo pinaagi sa cash-to-cash nga transaksyon.
Gawas sa seguridad sa suplay sa krudo, nahisgutan usab sa miting ang mga update sa kampanya batok sa krimen ug ilegal nga droga, ingon man ang pagpalig-on sa koordinasyon tali sa mga LGU ug mga pwersa sa seguridad. Nahimo usab kining higayon aron hisgutan ang mga isyu sa ekonomiya ug pagpanalipod sa mga konsumidor.
