Patay ang duha ka babaye samtang upat ka balay ang naapektuhan sa sunog nga nahitabo niadtong nakalabay nga adlaw, sa Purok 9, Malinawon, Millennium Village, Brgy. La Filipina, Tagum City, Davao del Norte. Sumala sa report sa Bureau of Fire Protection (BFP) Tagum, tulo ka balay ang hingpit nga naabo samtang usa ang partially damaged.
Sa inisyal nga imbestigasyon, giingon nga ang sunog nagsugod sa balay ni Evelyn Catalino tungod sa electrical short circuit gikan sa extension wire. Tungod sa paspas nga pagkaylap sa kalayo dali ra kining mitabok sa mga kasikbit nga kabalayan nga gama sa light materials.
Samtang napalgan na lamang ang lawas sa 18-anyos nga babaye kinsa giilang si Janelle Moli sulod sa CR sa ikaduhang andana, ug ang nasunog nga patayng lawas sa usa ka giilang si Highnon Plarisan, 34-anyos, usa ka person with disability (PWD), sa ubos usab nga bahin sa maong paabangan nga panimalay.
Subay sa gipagawas report sa Tagum City Police Station nga mokabat ang katibuk-ang damyos sa sunog og 2.5 milyon pesos.
