Patay ang duha ka driver sa motorsiklo human nagbangga sa tunga sa kalsada sa Purok 8, Barangay Capalayan sa Surigao City. Dead on the spot ang mga biktima segon sa Provincial Disaster Risk Reduction and Management Office (PDRRMO), sa lugar nahitaboan.
Naila ang mga namatay nga sila si Monsor Beneros Leyran, 23-anyos, kauban ang backride nga si Leo Villason Leyran, 26-anyos, residente sa Purok 6, Brgy. Capalayan, Surigao City.
Samtang ang ikaduha na motorsiklo si Angelo Brillo Cellona, 32-anyos, residente sa Purok 8 Upper, Brgy. Capalayan, sa dakbayan.
Base sa inisyal nga imbestigasyon, padulong sa Brgy. Cabongbongan ang motorsiklo ni Cellona samtang padulong sa Purok 6, Brgy. Capalayan si Monsor Leyran.
Pag-abot sa lugar nahitaboan aksidenteng nagsugat ang duha ka sakyanan. Tungod sa kakusog sa pagkabangga miresulta sa kamatayon sa duha ka drayber.
Ang backrider nga si Leo Villason Leyran, gilayon gidala sa Caraga Regional Hospital. Nasayran usab nga posible nga nakainom og ilimnong makahubog ang duha ka drayber.
Padayon ang imbestigasyon sa mga otoridad, samtang anaa na sa kustodiya sa Surigao City Police Station ang duha ka motorsiklo nga nalambigit sa aksidente.
