Balhog sa selda sa Tandag Component City Police Station ang usa ka 46-anyos nga lalaki human kini masikop sa gipahigayon nga buy-bust operation didto sa Purok Palmera, Balilahan, Barangay Mabua sa syudad.
Giila sa kapulisan ang suspek nga si alyas “Lalay,” minyo ug residente sa Barangay Cabugan, Bag-ong Lungsod. Atol sa maong operasyon, nakuha gikan sa posesyon sa suspek ang buy-bust money ug mga sachet sa gidudahang shabu nga giputos sa puting bond paper. Gawas niini, narekober usab gikan sa iyang bulsa ang usa ka Tecno nga cellphone.
Dugang kulba ang nasinati sa suspek human nakit-an sa kapulisan ang laing cellphone nga una niyang gihimakak nga dili iyaha. Apan wala makalusot ang suspek sa dihang giablihan ang maong unit ug nadiskubrihan sa sulod niini ang duha pa ka sachet sa gidudahang shabu lakip na ang aluminum foil.
Kasamtangang nagpabilin sa kustodiya sa TCCPS ang suspek samtang gihikay na ang kasong paglapas sa Comprehensive Dangerous Drugs Act batok kaniya. Padayon usab ang gihimong lawom nga imbestigasyon sa mga otoridad aron matumbok ang uban pang posibleng kauban niini sa iligal nga kalihokan.
