Duha ka mga biktima ang patay sa natigayong pagpangdunggab nga nahitabo sa Seaside Boulevard, Barangay Santiago, Pagadian City, niadtong nakalabay nga adlaw.
Ang mga biktima giila nga sila si “CJ”, 21-anyos, estudyante, lumulupyo sa Barangay Tiguma ug si alyas ” Datu” 37-anyos, minyo, kasamtangan nga nagpuyo sa Tiguma, Pagadian City apan lumad nga taga Cotabato City.
Base sa inisyal nga imbestigasyon sa kapulisan, nag-inom ang mga biktima uban sa ilang mga higala sa dihang adunay gubot nga nahitabo nga nagtukmod nga sila mobalhin sa laing imnanan apan mitumaw gihapon ang panaglalis nga miresulta sa komosyon.
Sa dihang misulay ang mga biktima pagbadlong aron pakalmahon ang sitwasyon kalit lang usab silang gidunggab sa suspetsado diin ang unang biktima naigo sa wala nga bahin sa dughan, samtang ang ikaduhang biktima nakaangkon og upat ka samad sa nagkalain-laing bahin sa lawas.
Dali nga gidala sa pinakaduol nga tambalanan ang duha ka mga biktima apan ang 37-anyos nga naka-angkon ug samad sa dughan gideklara nga dead on arrival sa miatiman nga doctor samtang ang usa nga nagpangidaron ug 21-anyos nakabsan ra usab sa kinabuhi pipila ka oras human nadala sa hospital.
Human sa panghitabo ang suspetsado dali nga misibat sa lugar ug gibiyaan ang iyang motorsiklo nga Kawasaki Barako 175 paingon sa Barangay San Pedro, Pagadian City.
Nakakustudiya na sa Pagadian City Police Station ang motorsiklo samtang padayon pa nga naglusad ug follow-up operation ang kapulisan aron maila ang mamumuno nga gawasnon pa.
Samtang sa pikas nga bahin, gipahiluna na sa usa sa mga punerarya sa syudad ang patay’ng lawas sa 21-anyos, ug ang patay’ng lawas sa 37-anyos gidala na usab sa syudad sa Cotabato aron kini mapahiluna sa kabanay.
