Gipahimangnoan sa Lokal nga Pangagamhanan sa Iligan City ang mga barangay opisyal nga responsibilidad nila ang paglimpyo ug pag-clear sa mga dalan sulod sa ilang barangay, subay sa Memorandum Circular No. 2024-053 nga gipagawas sa Department of the Interior and Local Government (DILG).
Gipadayag nga kabahin sa obligasyon sa mga barangay ang pagsumite og imbentaryo sa mga dalan, pag-ila sa mga babag sa karsada, pagpahigayon og regular nga clearing operations, ug pagpatuman sa mga ordinansa sama sa no parking ug one-sided parking.
Lakip usab niini ang pagtudlo sa mga residente nga dili magbutang og bisan unsang butang nga makababag sa dalan ug sidewalk.
Gipasiugda ni Ralp Oblenda, Head sa Iligan City Traffic, Parking and Management Office (ICTPMO) og kasamtangang Head sa Iligan City Oplan Disiplina, nga gimandoan ang mga barangay opisyal sa pagtangtang sa tanang istraktura ug kalihokan nga nakababag sa dalan sama sa tanod outpost, substations, plant box sa sidewalk, yuta ug grabas, pagbulad og humay, halayan, basketball court, illegal terminals, ambulant vendors, tents, trapal, ug extension sa mga tindahan.
Gidugang ni Oblenda nga obligado ang mga barangay opisyal sa pag-report kon natuman na ba nila ang maong mga buluhaton, og padayon silang imonitor sa DILG aron masiguro ang hustong implementasyon.
Gipahibalo usab nga bag-o lang nagpatuman og operasyon ang LGU kauban ang ICTPMO ug PNP–Traffic Enforcement Unit batok sa mga illegal terminal sa syudad.
Naghangyo si Oblenda sa mga pasahero nga didto lamang mosakay sa opisyal nga terminal sa may NSC, ilabi na kon ang destinasyon padulong sa Lanao del Sur ug Lanao del Norte, aron malikayan ang kasamok sa trapiko ug masiguro ang kahapsay sa kalsada.
