Giaprobahan sa Sangguniang Panlungsod sa Iligan City ang resolusyon nga naghangyo sa Local Finance Committee nga pondohan ang cash gift program alang sa mga Octogenarian, Nonagenarian, ug Centenarian. Ang maong resolusyon gisulong ni Providencio Abragan Jr., chairperson sa Committee on Senior Citizens and Veterans Affairs.
Sumala sa konseho, ang maong lakang kabahin sa pagpalig-on sa suporta sa lokal nga gobyerno alang sa mga senior citizen, ilabi na kadtong nakaabot na sa taas nga pangidaron. Una nang mihangyo si Frederick Siao nga himuan og ordinansa ang paghatag og counterpart nga benepisyo gikan sa syudad.
Gibase sa giaprobahang ordinansa, ang National Commission on Senior Citizens maghatag og Php10,000 alang sa mga Octogenarian ug Nonagenarian, ug Php100,000 alang sa mga Centenarian. Dugang niini, maghatag usab og counterpart ang LGU Iligan aron mapadako ang madawat nga benepisyo sa mga benepisyaryo.
Tungod niini, makadawat og kinatibuk-ang Php15,000 ang mga Octogenarian ug Nonagenarian, samtang ang mga Centenarian makadawat og Php150,000. Ang programa nagtinguha nga maghatag og dugang nga suporta ug pagpasidungog sa kontribusyon sa mga tigulang sa komunidad.
