Midonar si Governor Edwin I. Jubahib uban ni Vice Governor Clarice Jubahib og duha ka motorized bangka isip hinanaling aksiyon alang sa mga residente ug estudyante sa Sitio Kasilak, Barangay Sagayen, Asuncion, Davao del Norte.
Gigamit sa duha ka opisyal ang ilang personal nga kwarta nga mokabat og Php100,000 aron mapaspas ang solusyon, tungod kay dugay pa moabot kon ipaagi pa sa procurement process sa Kapitolyo.
Kumpleto usab ang mga bangka sa life jackets aron masiguro ang kaluwasan sa mga molabang sa sapa. Matod sa gobernador, gihimo nila kini isip dali nga tubag sa panginahanglan sa komunidad.
Dugang pa niya, ilang gipalihok ang pag-apruba sa Php15 milyon nga pondo alang sa pagtukod og hanging bridge isip permanenteng solusyon, samtang gisugo na ang pagsugod sa sunod semana alang sa kalsada gikan sa Barangay Sta. Filomena padulong sa maong sitio.
Nadiskubrehan sa gobernador ang problema human kini mikaylap sa social media, diin makita ang mga estudyante nga napugos sa pagkumbitay sa pisi aron makatabok sa sapa tungod sa kakulang sa luwas nga sakyanan.
Ang unang improvised nga bangka sa mga residente nalunod usab tungod sa pagbaha.
Nagpasalamat si Asuncion Mayor Atty. Rosario Dayaday sa paspas nga aksiyon sa gobernador, samtang gipahayag sa mga estudyante ang ilang kalipay nga dili na sila maglisod ug mas luwas na ang ilang pag-adto sa eskwelahan.
Photo courtesy : Provincial of DavNor
