Gipahatagan sa katin-awan sa CHED ang papel ug kahulogan kung unsa ang Commission on Higher Education o CHED sa sistema sa edukasyon sa Pilipinas.
Kini sumala pa ni Dr. Lourdes Cesar, Education Supervisor ug LUCs focal person sa CHED Davao Region atol sa pakighinabi sa Juander Radyo News Team kagahapong adlawa Marso 19, 2026.
Matod pa kang Dr. Cesar, ang CHED mao ang ahensya sa gobyerno nga nagdumala sa higher education, lakip na ang mga kolehiyo ug unibersidad sa nasod.
Ang ilang responsibilidad mao ang pagmonitor sa kalidad sa edukasyon, pag-apruba sa mga kurso, ug pagsiguro nga ang mga institusyon nagasunod sa national standards.
Gipasabot usab ni Dr. Cesar nganong gibulag ang CHED gikan sa Department of Education o DepEd. Matod pa niya, ang DepEd nagpunting sa basic education sama sa elementarya ug sekundarya, samtang ang CHED eksklusibo sa tertiary education.
Ang maong pagbulag gihimo aron mas mahatagan ug tukmang pagtagad ang matag lebel sa edukasyon. Pinaagi niini, mas napalawom ang pagdumala ug polisiya nga angay lamang sa kolehiyo ug unibersidad, nga lahi sa panginahanglan sa basic education.
Sa katapusan, giingon ni Dr. Cesar nga ang klarong pagbahin sa responsibilidad tali sa CHED ug DepEd makatabang sa pagpauswag sa kalidad sa edukasyon sa nasod ug sa pag-andam sa kabatan-onan alang sa ilang kaugmaon.
