Nakadawat og educational assistance ang 23 ka survivors sa Online Sexual Abuse and Exploitation of Children (OSAEC) sa unang quarter ning tuiga pinaagi sa Project SAFE, sumala sa report ni Jennifer P. Sanggoyod, focal person sa OSAEC.
Ang maong tabang naglangkob sa tulo ka college students nga nakadawat og tag ₱8,000 matag usa. Napulo usab ka high school students ang midawat usab og tag ₱5,000, samtang laing napulo ka elementarya nga mga estudyante ang nakadawat og tag ₱3,000 matag usa.
Ang Project SAFE usa ka programa sa Department of Social Welfare and Development (DSWD) nga nagtumong sa pagtabang sa mga OSAEC survivors aron makapadayon sa ilang pag-eskwela ug makabalik sa normal nga panginabuhi. Matag quarter, ginahatagan og educational assistance ang mga benepisyaryo.
Sumala pa ni Sanggoyod, gikan Enero hangtod Disyembre 2025, adunay 68 ka survivors ang naluwas pinaagi sa padayon nga operasyon sa OSAEC task force. Dugang pa, lima ka survivors ang bag-ohay lang usab nga na-rescue sa pinakahuling operasyon.
Kahinomduman usab nga bag-o lang mibisita ang DSWD sa Iligan aron sa pag-validate sa lokal nga mga paningkamot, paghatag og technical support, ug pagsiguro nga ang proyekto naka-align sa nasudnong polisiya ug mga programa.
