Gipasusi sa bag-ong Regional Director sa Land Transportation Office (LTO), Atty. Wendel Dinglasan, ang imbestigasyon sa isyu sa nagtapok nga mga plaka sa sakyanan sa rehiyon.
Sumala sa taho nga iyang nadawat, aduna pay daghang mga plaka nga wala pa marelease ug nagpundo sa nagkadaiyang LTO offices ug bisan sa pipila ka mga car dealers.
Matod ni Dinglasan, iyang liboton ang tanang opisina sa LTO sa tibuok rehiyon aron personal nga masuta ang kahimtang ug masayran kung pila pa ka mga plaka ang wala pa mahatag sa mga tag-iya sa sakyanan.
Giplano usab niya ang pakigtambayayong sa mga lokal nga kagamhanan aron mapaspasan ug mapadali ang distribusyon sa mga plaka ngadto sa mga benepisyaryo.
