Nagpadayon ang Land Transportation Franchising and Regulatory Board (LTFRB) Region 9, kauban ang Highway Patrol Group (HPG) ug Land Transportation Office (LTO), sa ilang joint operation batok sa mga “kulorum” o illegal nga public transport sa Zamboanga Peninsula.
Matod ni LTFRB Regional Director Tommy “Tanjie” Macadindang iyang gipahayag nga sa pinakabag-ong operasyon, daghang mga sakyanan ang nasita ug giisyuhan og violation, samtang upat (4) niini ang gi-impound tungod sa seryosong paglapas sa regulasyon sa public transport.
Dugang pa niini, bisan giingong limitado ang law enforcement power sa ilang buhatan sa pagdakop sa mga kulorum, padayon gihapon ang ilang pakigtambayayong sa ubang ahensya aron mapugngan ang illegal nga operasyon sa mga sakyanan nga namasahero bisan walay prangkisa o legal nga permit.
Gipasidan-an usab ni Macadindang nga ang mga madakpan nga nag-operate og kulorum nga sakyanan nga sila mahimong makatagamtam og dakong multa, lakip ang posibleng pagkakumpiska sa sakyanan ug pagpasang-at og kaso batok sa operator.
Padayon usab ang panawagan sa ahensiya ngadto sa publiko nga mosakay lamang sa mga legal ug rehistradong public utility vehicles aron masiguro ang kaluwasan sa ilang pagbiyahe.
