Gipahibalo ni Surigao del Sur Governor Johnny Pimentel ang iyang tinguha nga i-suspinde ang pagpatuman sa four-day work week sa probinsyal na panggamhanan aron masiguro ang padayong pagpangalagad sa katawhan.
Gibutyag sa gobernador nga iyang naobserbahan niadtong Marso 13, adlawng Biyernes, ang daghang ihap sa mga katawhan ang niadto sa nagkadaiyang opisina sulod sa Kapitolyo aron maghikay sa ilang mga transaksyon. Matod ni Pimentel, makapasubo tan-awon nga ang mga tawo, ilabi na kadtong gikan pa sa lagyong mga lungsod, moabot sa kapitolyo apan wala silay maabtan nga empleyado tungod sa maong polisiya.
Gihatagan og gibug-aton sa gobernador ang kabalaka sa mausik nga plete ug panahon sa mga Surigaonon nga moadto sa probinsyal nga panggamhanan.
Tungod sa kasamtangang sitwasyon sa probinsya, nakig-dayalogo matod pa ang gobernador sa legal counsel aron pormal nga i-suspend ang 4-day work week nga sistema. Kini gihimo sa tumong nga mahatagan og saktong serbisyo ang matag lungsoranon nga nagkinahanglan og dinalian nga tabang gikan sa gobyerno.
Photo Courtesy: WIKIPEDIA
