Gitunolan sa probinsyal nga panggamhanan sa Surigao del Sur ang mga layong barangay sa Lanuza human sa kalamidad nga dala sa Bagyong Basyang niadtong Pebrero.
Lakip sa mga benepisyaryo ang Barangay Pakwan, nga usa sa priority area, kauban ang Barangay Nurcia ug Barangay Sibahay, nga labing naapektuhan sa bagyo.
Sumala sa lokal nga panggamhanan, niadtong Pebrero 24, kapin sa 320 ka pamilya sa Barangay Pakwan ang nakadawat og relief assistance sama sa bugas, de-lata, tubig, ug uban pang batakang panginahanglan. Ang distribusyon gipasiugdahan sa provincial government uban sa koordinasyon sa mga opisyal sa barangay aron masiguro ang hapsay ug organisadong pag-apod-apod.
Gawas sa Barangay Pakwan, nakadawat usab og relief assistance ang ubang apektadong komunidad, lakip ang 354 ka pamilya sa Barangay Nurcia ug 470 ka pamilya sa Barangay Sibahay.
Padayon ang paningkamot sa lokal ug probinsyal nga panggamhanan sa paghatag og suporta sa mga komunidad nga naapektuhan sa kalamidad, samtang gipalig-on ang koordinasyon alang sa mas epektibong disaster response sa umaabot.
Photo courtesy: Provincial Government of Surigao del Sur
