Gipahibalo sa Department of Energy (DOE) nga posibleng moabot ngadto sa ₱114 kada litro ang presyo sa diesel karong semanaha human sa gipaabot nga dakong pagsaka sa presyo sa lana. Sumala ni DOE Undersecretary Sharon Garin, nagkasundo ang mga dagkong kompanya sa lana nga bahin-bahion ang pagsaka sa presyo sulod sa tulo ka adlaw—gikan Marso 17 hangtod 19—aron dili kaayo mabug-atan ang mga motorista sa kalit nga epekto niini.
Tungod sa maong “staggered” nga dagdag-presyo, gibanabana nga ang presyo sa diesel sa Metro Manila mokabat na sa ₱94 hangtod ₱114 matag litro.
Tungod niini, gitun-an na sa gobyerno ang posibilidad sa “government-to-government transactions” uban sa mga nasud sama sa China ug Russia aron makapalit og krudo o finished petroleum products sa mas barato nga presyo. Bisan pa sa kamahal sa lana, gipaniguro sa DOE nga duna pay igong suplay ang nasud hangtod sa katapusan sa Abril, apan gilauman nga mas mahal na ang mosunod nga suplay alang sa bulan sa Mayo.
Ang pagsaka sa presyo sa diesel gilaumang maghatag og bug-at nga epekto sa pletehan, presyo sa mga paliton, ug sa kinatibuk-ang ekonomiya sa nasud tungod kay kini ang nag-unang fuel nga gigamit sa mga pampublikong sakyanan ug trucking services.
Photo Courtesy:Dreamstime.com
