Nasakmit sa mga operatiba sa Philippine Drug Enforcement Agency (PDEA) Regions 9 ug 10 ang gibana-banang Php5.4 milyon nga kantidad sa gituohang shabu atol sa usa ka buy-bust operation sa Iligan City niadtong Marso 17, 2026.
Sikop sa operasyon ang magtiayon nga giila nga sila si alyas Mohamad ug Maimana, human sila mapalitan og walo ka dagkong pakete sa ilegal nga droga nga gibana-banang adunay kinatibuk-ang gibug-aton nga 800 gramos.
Gipahigayon ang operasyon sa parking area sa usa ka mall sa maong syudad, diin malampusong napatuman ang transaksyon nga nagresulta sa pagdakop sa duha ka suspek.
Gidala ang magtiayon sa PDEA Regional Office sa El Salvador, Misamis Oriental aron ipailalom sa drug testing ug uban pang pamaagi sa imbestigasyon, samtang gikatakdang ibalik sila sa Iligan City alang sa inquest proceedings. Og kasamtangan pang gipangita ang driver sa sakyanan nga nakasibat human sa operasyon.
Sumala sa imbestigasyon, ang maong sakyanan-usa ka brown nga Suzuki Ertiga nakit-an nga gibyaan sa dalan sa 1st East Rosario Heights, Tubod, Iligan City, human kini gigukod sa mga operatiba sa PDEA ug PNP gikan sa lugar sa buy-bust operation.
Padayon karon ang lawom nga imbestigasyon sa PDEA uban sa kapulisan aron masuta ang dugang detalye sa kaso ug madakpan ang nakalingkawas nga suspek.
