Nipagawas og pamahayag ang Department of Trade and Industry (DTI) nga walay pagsaka sa presyo sa mga nag-una nga mga panginahanglanon sa mosunod nga 30 kaadlaw.
Kini human sa pasalig sa buhatan nga ipabilin nga steady ang presyo sa mga palaliton bisan sa isyu sa suplay niini subay sa nahitabong tensiyon sa Middle East.
Matod sa DTI nga nihimo kini og kasabutan ngadto sa 21 ka mga manufactures diin lakip sa magpabiling steady ang presyo sa palaliton ang mga produktong de lata, pan, bottled water, instant noodles, kape, sabon, ug kandila.
Sa wala pa nahitabo ang maong panagsabot, segon ni Trade Secretary Cristina Roque nga nihimo kini og pangkonsulta sa logistics firms alang sa pag-asses sa epekto sa panagbangi sa Middle East ngadto sa supply chains.
Dugang ni Roque nga magpadayon ang ahensya sa DTI sa pagsiguro nga mahimong reasonable ang presyo sa mga palaliton taliwa sa krisis.
