Gilauman ang usa ka kusog ug dili matag-an nga panagsangka sa umaabot nga IRONMAN 70.3 Davao, diin mokabat sa 1,000 ka triathletes gikan sa 30 ka nasud ang moapil sa main race nga pagahimoon karong Domingo, Marso 22.
Apan, ang kinatibuk-ang partisipasyon sa tibuok race weekend gilauman nga molapas sa 3,000 uban ang mga side events. Ang kompetisyon maglakip sa mga atleta gikan sa lain-laing nasud lakip na ang Australia, Japan, United States ug Great Britain, nga moatbang sa kusgan nga grupo sa mga Filipino triathletes.
Manguna sa foreign contenders sila Rodrigo Delgado sa Spain, Pin Wei Toh sa Singapore, ug Benedict Carlie sa Australia. Samtang sa local side, mosukol sila Irienold Reig Jr., John Rey Rasay, Christian Seguia, ug uban pa aron depensahan ang dungog sa nasud.
Ang lumba maglangkob sa 1.9-kilometer nga langoy, 90-kilometer nga bike, ug 21.1-kilometer nga dagan, uban sa giusab nga bike course aron mas madugangan ang kalisod ug estratehiya sa kompetisyon ilawom sa init nga klima sa Davao.
Sa women’s category, manguna si Bea Quiambao uban sa ubang miyembro sa national team, samtang mosalmot usab ang ubang Filipino athletes sa age-group divisions.
Lakip sa mga side events ang Sunrise Sprint triathlon, Gwapa Dabawenya Run, ug IRONKIDS Davao, nga maghatag og oportunidad sa mga bag-o ug batan-ong atleta.
Gawas sa kadaugan, adunay usab qualifying slots alang sa IRONMAN 70.3 World Championship nga pagahimoon sa Nice France, nga dugang inspirasyon sa mga partisipante.
Ang kalihokan kabahin sa paningkamot sa gobyerno ug mga partner agencies aron mapalig-on ang Pilipinas isip usa ka top destination sa endurance sports.
Photo Courtesy: City Government of Davao
