Kung nagtuo ka nga ang pub para lang sa inom ug istorya, lahi ang nahitabo sa usa ka pub sa London.
Nag-viral sa social media ang kalihokan nga gitawag og “Pints & Ponytails,” diin kapin 35 ka amahan ang nagtigom sa sulod sa pub—dili aron mag-inom kundili magkat-on og pag-braid ug pag-ponytail sa buhok.
Matod pa, matag amahan adunay mannequin head nga murag ulo sa barbie, samtang gitudloan sila sa mga hairstylist gikan sa BraidMaidens kung unsaon pag-atiman ug pag-style sa taas nga buhok.
Sa unang tan-aw, kataw-anan lantawon mga dagko og lawas nga lalaki nga nag-inom og beer samtang nagpraktis og braid. Murag parenting class nga nahimong beauty salon sa pub.
Apan matod pa sa mga amahan, seryoso ang ilang tuyo. Gusto lang nila matabangan ang ilang mga anak nga babaye sa pag-andam sa buntag, labi na sa pagsuklay ug pag-ponytail sa buhok.
Ug didto nila nasabtan nga usahay, ang simple nga butang sama sa pagsuklay sa buhok sa bata mahimong higayon sa istorya, katawa, ug mas lig-on nga relasyon sa pamilya.
Busa kung makakita ka sunod og amahan nga nagpraktis og braid—ayaw katingala basin training na diay na para sa iyang prinsesa sa balay.
Photo Courtesy:Factz+
