Patay ang usa ka graduating student sa kursong Criminology sa nahitabong disgrasya sa motor niadtong nakalabay nga adlaw. Naila ang nakalas nga drayber sa motorsiklo nga si alyas Jovan, samtang ang duha niini ka mga angkas naila sa alyas Diego ug alyas Alvin.
Subay sa inisyal nga imbestigasyon, nagbiyahe ang tulo sakay sa usa ka motor gikan sa usa ka bar ug paingon na unta mopauli. Gituohang nakainom ang mga biktima hinungdan nga nawad-an sa kontrol ang drayber ug mibangga ang ilang gisakyang motor sa sementadong bahin sa rotunda sa lungsod sa San Francisco, Agusan Del Sur.
Tungod sa kakusog sa impak, nakaangkon og seryosong samad ug bun-og sa kalawasan ang mga biktima. Daling gidala ang tulo sa Tagum Regional Hospital, apan gideklarang Dead on Arrival (DOA) sa doktor si Jovan.
Sa pagkakaron, gihaya na ang biktima sa iyang pamilya samtang ang duha ka mga kauban niini anaa pa sa kritikal nga kondisyon ug padayong giobserbahan sa mga doktor.
Photo Courtesy: San Francisco MPS
