Nakabawi ang mga kasundalo gikan sa 30th Infantry Battalion (30IB) ubos sa 401st Infantry Brigade ug daghang high-powered nga armas, bala, ug personal nga gamit nga gituohang gitago sa New People’s Army (NPA) sa usa ka operasyon militar sa San Miguel, Surigao del Sur niadtong Biyernes.
Sumala sa pahayag ni Glenn Joy Aynera, acting commander sa 401st Infantry Brigade, ang mga armas ug bala narekober sa kabukiran sa Sitio Comarobcob, Barangay Carromata atol sa padayon nga combat operations sa maong lugar.
Lakip sa mga narekober mao ang tulo ka M16A1 rifles, usa ka Colt M4 rifle, ug 173 ka bala, uban ang mga magasin, bandolier, backpack, ug uban pang personal nga gamit nga gituohang iya sa mga rebelde.
Matod ni Aynera nga ang maong mga armas gituohang gitago sa mga nahibiling miyembro sa Sub-Regional Sentro De Grabidad (SRSDG) Westland nga sakop sa North Eastern Mindanao Regional Committee sa NPA.
Gipahayag usab niya nga ang pagkarekober sa mga armas usa ka dakong hagit sa nahibiling kapasidad sa rebelde sa maong lugar.
Samtang, giingon ni Michele Anayron Jr., commander sa 4th Infantry Division, nga ang padayon nga pagkadiskubre sa mga arms cache nagpakita sa kalampusan sa mga focused military operations batok sa mga armadong grupo.
Matod pa niya, niadtong Marso 11, nakabawi usab ang mga tropa sa 30IB ug usa ka R4 rifle, dugang nga mga bala, magasin, ug personal nga gamit sa samang grupo sa NPA sa kabukiran sa Sitio Lago sa Barangay Carromata.
Gipadayag usab sa militar ang ilang panawagan sa mga nahibiling miyembro sa rebelde nga grupo sa lugar nga mosurender na ug mobalik sa malinawon nga kinabuhi, uban sa kasigurohan nga andam ang gobyerno sa pagtabang kanila aron makasugod pag-usab uban sa ilang pamilya ug komunidad.
Photo courtesy: 401st Infantry Division
