Giaprobahan sa World Bank ang $800 milyon nga loan sa Pilipinas aron mapalig-on ang fiscal management sa nasud, madani ang mas daghang private secrtor nga mapalambo ang kahibalo ug kahanas sa mga mamumuo aron makakuha og mas maayong trabaho.
Sumala sa pahayag sa World Bank, ang pondo ipahigayon pinaagi sa Philippines Growth and Jobs Development Policy Loan, nga nagtinguha sa pagpalig-on sa ekonomiya ug paghimo og daghang oportunidad sa trabaho alang sa mga Pilipino.
Matod pa ni Zafer Mustafaoglu, country director sa World Bank para sa Pilipinas, Malaysia ug Brunei Darussalam, padayon nilang gisuportahan ang mga prayoridad sa Pilipinas aron ang kusog nga pagtubo sa ekonomiya mahimong mas daghan ug mas maayong trabaho alang sa katawhan.
Ang maong pondo gamiton sa tulo ka importante nga aspeto, pagpalig-on sa fiscal management ug maayong paggasto sa pondo sa gobyerno, pagpasayon sa mga regulasyon aron madani ang lokal ug mga langyaw nga mamohunan, ug pagpalambo ang edukasyon ug technical-vocational training nga mag hatag kahanas sa mga trabahante.
Sumala usab sa senior economist sa World Bank nga si Jaffar Al-Rikabi, ang mga reporma gilauman nga makadani og pribadong sektor, makahatag og mas daghang trabaho, ug makapalambo sa kalidad sa ekonomiya sa nasud.
Samtang, gibutyag ni Frederick Go, kalihim sa Department of Finance, nga ang maong pondo usa ka dakong pagsalig sa lig-on nga direksyon sa ekonomiya sa Pilipinas, ug gamiton aron masuportahan ang negosyo, makahatag og trabaho ug mapalambo ang serbisyo publiko alang sa tanang Pilipino.
Photo Courtesy: The Summit Express
