Nadakpan sa mga personahe sa kapulisan ang usa ka Most Wanted Person kinsa nag-atubang og pito ka ihap sa kasong pag panglugos didto sa Trento, Agusan del Sur, niadtong nakalabay nga adlaw.
Giila ang suspek nga ika-lima sa listahan sa Most Wanted Persons ubos sa Police Regional Office 13. Napasikop ang maong lalaki pinaagi sa hiniusang pwersa sa Trento Municipal Police Station ug Agusan del Sur Provincial Police Office ubos sa kamanduan ni PNP Chief PGEN Jose Melencio C. Nartatez Jr. Gisilbi sa mga otoridad ang warrant of arrest alang sa 7 counts sa pagpanglugos diin walay pyansa nga girekomenda alang sa iyang temporaryong kagawasan.
Gipahayag ni PGEN Nartatez nga kining maong kalamposan usa ka tin-aw nga mensahe nga manubag gayod ang mga malapason sa balaod. Matod pa niya, padayon nilang giprotektahan ang katungod sa matag lungsoranon batok sa bisan unsang matang sa krimen.
Gisunod sa maong operasyon ang PNP Focused Agenda nga nagtinguha sa mas dekalidad ug daling serbisyo sa kapulisan ngadto sa komunidad. Gihatagan usab og gibug-aton ni Nartatez nga pinaagi sa malampusong pagdakop sa mga wanted, gipamatud-an sa kapulisan nga adunay hustisya alang sa matag biktima ubos sa direktiba ni Presidente Ferdinand R. Marcos Jr.
Kasamtangan nang anaa sa kustodiya sa Trento MPS ang suspetsado samtang giandam ang mga dokumento alang sa tukmang disposisyon niini sa korte.
