Mikunhod ang lokal nga merkado sa stocks sa nasod human nahimong mabinantayon ang mga investor tungod sa nagpadayon nga tensyon sa Middle East ug sa epekto niini sa presyo sa lana.
Sa trading sa nilabay nga adlaw, miubos og 0.73 porsiyento o 44.75 puntos ang Philippine Stock Exchange Index o PSEi, ug miundang sa lebel nga 6,113.58.
Matod ni Luis Limlingan, head of sales sa Regina Capital Development Corporation, nahulog sa selling mode ang merkado human misaka pag-usab ang presyo sa lana nga miabot sa 100 dolyar matag baril.
Gipasabot ni Limlingan nga ang pagsaka sa presyo sa petrolyo nakapukaw og kabalaka sa posibleng pagtaas sa inflation, nga mahimo usab magduso sa posibleng interest rate hike sa Bangko Sentral ng Pilipinas.
Samtang si Japhet Tantiangco, financial research manager sa Philstocks Financial Inc., miingon nga nahuyang ang market sentiment human magpasidaan ang Iran nga posibleng mosaka pa hangtod 200 dolyar matag baril ang presyo sa lana tungod sa nagpadayon nga gubat batok sa United States.
Ang padayon nga pagsaka sa presyo sa lana gituohang makapadugang sa inflation ug gasto sa negosyo ug mga konsumidor, maong daghang investor ang mipili nga mag-amping sa ilang pamuhunan.
Photo courtesy: Philstar
