Gitugotan sa Maritime Industry Authority o MARINA ang mga shipping companies nga magpatuman og hangtod 20 porsyento nga pagtaas sa pasahe sa mga pasahero tungod sa nagpadayong krisis sa Middle East nga nakaapekto sa supply ug presyo sa lana sa kalibutan, apan subject pa kini sa 14 ka adlaw nga period adiser ra mag take effect ang upward adjustment.
Sa advisory nga gipagawas niadtong Marso 6, matud ni Chrystal John T. Luego, Senior Maritime Industry Development Specialist sa MARINA-13, ang maong lakang usa ka contingency measure aron matabangan ang maritime industry nga makasugakod sa pagsaka sa presyo sa fuel.
Sumala sa MARINA, gitugotan ang upward adjustment sa passenger fare ug cargo freight rates o fuel surcharge nga hangtod sa 20 porsyento sa base fare.
Apan gipasabot sa ahensya nga temporaryo lamang ang maong pagtaas ug ipatuman lang samtang nagpadayon ang krisis.
Gipahinumduman usab ang mga shipping companies nga kinahanglan dayon nilang ipaubos ang pasahe sa dihang matapos na ang emergency o krisis nga nakaapekto sa presyo sa lana.
Dugang pa sa MARINA, posible usab nga moubos o limitahan sa mga shipping companies ang ilang biyahe, ug mahimo usab ang paghiusa sa mga pasahero ug kargamento sa usa ka biyahe aron mapuno ang kapasidad sa barko ug makunhuran ang gasto sa operasyon.
Gikinahanglan usab ang mga operator nga magpagawas og travel advisories aron ipahibalo sa mga pasahero ang posibleng trip consolidation, pag-usab sa schedule, o limitasyon sa biyahe.
Samtang nagpadayon ang pagsaka sa presyo sa fuel, gitugotan usab sa MARINA ang pipila ka relief measures aron mapagaan ang gasto sa shipping companies. Lakip niini ang pag-waive sa bayad sa annual tonnage fee alang sa 2026, ug 75 porsyento nga diskwento sa bayranan sa aplikasyon sa pagkuha og ship documents ug certificates.
Photo Courtesy: MARINA RGIONAL OFFICE XIII
