Tungod sa ka laay, unom ka tin-edyer gikan sa Tonga ang nahimong bida sa usa ka talagsaong istorya niadtong 1965.
Sumala sa report, ang unom ka estudyante gikan sa usa ka istriktong boarding school nagdesisyon nga mag adventure sa dagat aron matod pa molarga paingon sa Fiji. Apan tungod kay wala sila nagplano og tarong, walay mga pagkaon ug mga importanteng gamit ang na dala.
Sa unang gabii pa lang sa biyahe, nasugatan dayon sila og kusog nga bagyo nga nakaguba sa layag ug rudder sa ilang gamayng bangka. Resulta: walay direksyon nga naglutaw-lutaw sa dagat sulod sa walo ka adlaw.
Sa kadugayan, naanod sila sa usa ka isla nga ginganlan og Ata Island pero walay laing tawo ng anag puyo.
Didto nagsugod ang ilang “survival reality show.” Naghimo sila og mga balaod sama sa: walay away. Kung adunay maglalis, kinahanglan magbulag ug mo adto sa duha ka tumoy sa isla sulod sa upat ka oras aron mabugnaw ang ulo.
Nakatukod sila og balay, sistema sa pagkuha og ulan nga tubig, ug naka himo og kalayo sulod sa kapin 15 ka bulan.
Human sa usa ka tuig kapin nga pagkastranded, nakita sila sa usa ka Australian fisherman nga si Peter Warner ug gidala pabalik sa ilang nasod.
Apan inay nga hero’s welcome, adunay twist ang istorya.
Pag-abot nila balik sa Tonga, diretso sila gidakop sa pulis tungod sa kaso sa pagpangawat sa bangka nga ilang gigamit 15 ka bulan ang milabay.
Maayo na lang kay si Captain Warner mismo ang mibayad sa bangka ug dayon gihire ang unom ka tin-edyer isip crew sa iyang fishing boat.
Busa matod pa sa uban: kung bored ka sa eskwelahan, ayaw lang gyud buhata ang pag cutting classes kay basin tour sa isla ang ending, pero priso ang welcome party.
Photo Courtesy: RNZ
