Giapela sa Philippine Sports Commission (PSC) ang tanang national athletes ug sports teams nga limitahan ang ilang biyahe sa gawas sa nasud, labi na sa mga nasud nga apektado sa nagpadayong tensyon sa Middle East.
Sumala sa advisory ni PSC Chairman Pato Gregorio, giingon niya nga ang mga atleta dili angay mag-biyahe sa Middle East kung walay importante nga katungdanan sa rehiyon tungod kay ang sitwasyon posible makaapekto sa international air routes ug transportasyon.
Gipasabot usab ang nahitabo sa Philippine chess team sa Russian Chess Crown Standard A Tournament sa Moscow, diin nadugay ang flight pauli gikan Abu Dhabi tungod sa closure sa United Arab Emirates airspace. Gipangitaan dayon og solusyon sa PSC ug nakabalik ang team sa Pilipinas sa Martes.
Gipahimangnoan ni Gregorio ang tanang national sports associations nga i-reschedule o i-postpone ang ilang overseas trips alang sa kaluwasan sa mga atleta. Ang PSC magpadayon sa pag-monitor sa sitwasyon ug maghatag og updates kung kinahanglan.
Ang kaluwasan ug kaayohan sa mga atleta nagpabilin nga pinakaunang prioridad sa PSC.
Photo Courtesy: Opinyon News
