Tensiyonado ang panghitabo sa Capitec Bank human nagbuhat og talagsaong aksyon ang usa ka pamilya tungod kay gidala nila ang patay’ng lawas sa ilang kabanay sulod sa opisina sa maong bangko. Base sa mga report ug mga video nga nikatap sa social media, makita ang lawas nga giputos ug gipahimutang duol sa customer service area.
Sumala sa pamilya, napugos sila nga buhaton kini aron ipakita ang ebidensiya sa kamatayon sa ilang kabanay, human sila matod pa gipalisod-lisod sa pag-claim sa funeral insurance. Misamot pa ang tensiyon sa opisina tungod kay dali-daling gipagawas ang mga empleyado ug kustomer, samtang temporaryong gisirad-an ang bangko alang sa seguridad ug kalimpyo.
Sa pikas bahin, nagpagawas og pahayag ang Capitec Bank aron ipasabot ang husto nga proseso sa pag-claim nga ang death certificate lamang ang gikinahanglan ug dili ang lawas sa namatay.
Gipaabot sa bangko ang pagpahinumdom sa mga kliyente nga mas sayon ug hapsay ang proseso kon sundon ang tama nga dokumentasyon.
Photo courtesy : The south African Post
