Aron malikayan ang kakuwang sa suplay ug ang pagmahal sa presyo sa palaliton, giduso ni Konsehal George Christopher Goking ang pagmugna og express lane system diha sa Macabalan Port.
Sa sesyon niadtong Lunes, kusganong gihangyo ni Goking, ang chairman sa Committee on Trade and Commerce, ang pagpasar og ordinansa nga mohatag og prayoridad sa mga barkong nagdala og mga importanteng kinahanglanon sa katawhan.
Ubos sa sugyot, tinguha sa konsehal nga paspasan ang proseso sa mga imported nga bugas ug mga tambal pinaagi sa:
Dali nga Pagdiskarga: Unahon ang pagdunggo sa mga barko nga nagdala og prayoridad nga mga produkto.
Paspas nga Inspeksyon: Siguraduhon nga dili malangan ang pag-eksamin sa mga kargamento.
Dokumentasyon ug Release: Pag-atiman dayon sa mga papelis aron makagawas dayon ang mga produkto gikan sa port padulong sa mga bodega ug merkado.
Gikabalak-an sa konsehal nga kon malangan ang pagdiskarga sa mga barko nga nagdala og bugas, maapektuhan ang lokal nga suplay ug ang kinatibuk-ang siguridad sa pagkaon sa syudad.
Pinaagi sa pag-institutionalize niini nga mekanismo, masiguro nga adunay sundon nga sistema ang pantalan matag higayon nga adunay moabot nga mga kritikal nga kargamento.
Kini nga special report giduso na ngadto sa Committee on Agriculture ug sa Committee on Trade and Commerce alang sa dugang nga pagtuon ug dinaliang aksyon.
Photo courtesy: Discover the Philippines
