Patay ang usa ka miyembro sa LGBTQ+ human maigo sa bala nga gipabuto sa usa ka sundalo sulod sa usa ka resto bar sa National Highway, Barangay Poblacion, Polomolok, South Cotabato, niadtong nakalabay nga adlaw. Ang biktima giila nga si Ariel Peligro, 47-anyos, residente sa Barangay Lam-Caliaf sa maong lungsod.
Ang biktima, nakaangkon ug grabi nga samad sa dughan nga milapos ngadto sa iyang likod. Dali siyang gidala sa ospital apan gideklarar nga dead on arrival sa mga doktor. Sa inisyal nga impormasyon, nagkaon ang biktima uban sa iyang mga higala sa maong lugar sa dihang nagmaoy ang suspek ug kalit nga nagpabuto sa pusil.
Ang suspek giila nga si Private First Class Ronie Bendisula, nga naka-assign sa 6th Infantry Division Philippine Army sa Awang, Cotabato. Sumala sa report. Nakadungog og sunod-sunod nga buto ang mga residente pasado alas 1:00 sa kaadlawon ug sa ilang pagtan-aw, nakita nga na-corner ang suspek ug gikulata sa ubang kostumer.
Dugang pa sa impormasyon nga una nang nagbangi ang suspek ug ang iyang senior officer sa maong lugar. Human mihawa ang senior officer, nagpadayon ang lalis sa suspek ug sa iyang asawa hangtod nga nagpabuto siya.
Sa pagkakaron, ang suspek naka hospital arrest sa Polomolok General Hospital tungod sa mga samad nga iyang naangkon, samtang padayon ang imbestigasyon sa Polomolok Municipal Police Station.
Photo Courtesy: JEFF
