Gipahibalo sa Department of the Interior and Local Government (DILG) nga dunay 63 ka local government units sa tibuok nasud ang nakadawat og national recognition tungod sa maayong performance sa ilang Anti-Drug Abuse Council (ADAC). Sa maong nationwide audit, 1,291 usab ka LGUs ang nakab-ot og “highly functional” nga rating.
Sa 63 ka national awardees, adunay usa ka probinsya, tulo ka syudad, ug 59 ka mga lungsod. Ang matag usa niini nakakuha og labaw sa 80 puntos sa performance audit nga nagpasabot nga lig-on ug padayon ang ilang kampanya batok sa ilegal nga droga, lakip ang epektibong programa sa pagbalik sa komunidad sa mga nakapa-rehab ug regular nga pagmonitor kanila.
Sa kinatibuk-an, ang 1,291 ka LGUs nga “highly functional” naglakip sa 53 ka probinsya, 33 ka syudad, ug 1,205 ka mga lungsod. Gisukod sa maong audit ang organisasyon sa konseho, regular nga miting, pondo ug pagpatuman sa programa, pagmonitor sa mga barangay, padayon nga drug-clearing operations, access sa rehabilitation ug reintegration services, ug drug testing aron masiguro ang integridad sa mga opisyal ug miyembro.
Kalabot niini, upat ka LGUs sa rehiyon sa SOCCSKSARGEN ang nakasulod sa 63 ka national awardees. Kini mao ang Antipas sa North Cotabato, Lambayong ug Kalamansig sa Sultan Kudarat, ug Alabel sa Sarangani Province. Dugang pa, tanang probinsya sa SOCCSKSARGEN na-rate nga “highly functional” ang ilang ADAC, samtang kadaghanan sa mga lungsod ug syudad sa rehiyon nakab-ot usab ang maong rating base sa performance standards sa DILG.
Photo Courtesy:Jing
