Nakadamay ug laing motorista ang usa ka lalaki human magbangga ang duha ka motorsiklo sa National Highway sa Barangay Palian, Tupi, South Cotabato pasado alas 6:13 sa gabii niadtong Marso 1, 2026. Parehong nasamdan ang duha ka rider tungod sa kusog nga impact sa ilang pagsalpok.
Giila nga si alyas “Jeffrey,” 46 anyos ug residente sa Barangay Palian, ug si alyas “Cedee,” 28 anyos nga taga Lake Sebu. Sumala sa imbestigasyon sa Tupi Municipal Police Station, kalit lang migawas gikan sa barangay road si Jeffrey sakay sa iyang motorsiklo ug mitabok sa highway apan wala niya mamatikdi ang nagpadulong nga Honda CB150.
Tungod sa kusog nga bangga, nalagpot ang duha ka rider ug nabagnos sa kalsada. Nadiskubre sa mga awtoridad nga si Jeffrey anaa sa impluwensya sa makahubog nga ilimnon ug walay maipakitang driver’s license sa oras sa insidente.
Dali nga gidala sa Tupi Municipal Disaster Risk Reduction and Management Office ang mga biktima sa Roel Senador Memorial Hospital. Apan tungod sa grabeng samad, gibalhin si Jeffrey sa South Cotabato Provincial Hospital samtang ang usa ka rider gi-CT scan tungod sa posibleng samad sa ulo o head concussion.
Photo Courtesy: Tupi MPS
