Dili na kinahanglan og mission order ang mga personnel sa Land Transportation Office (LTO) sa pagpatuman sa checkpoint operations sa nagkadaiyang mga kadalanan sa syudad sa Pagadian.
Kini ang pagpatin-aw nga tubag ni LTO Pagadian District Office Chief Allan Macabangkit human siya gipangutana ni City Councillor Ariel Lim, atol sa ika 27 nga regular session sa Sangguniang Panglungsod kagahapon, Pebrero 25, 2026.
Dugang pagpaklaro ni Macabangkit ang sagad lang nga nagkinahanglan ug mission order kun may mga special operation ang mga deputized personnel sa LTO lapas sa ilang boundary.
Segon ni Macabangkit, ang pagpahigayon sa checkpoint kabahin sa ilang regular nga mandato sa pagpatuman sa balaod sa trapiko busa di na kinahanglan ang tagsa-tagsang mission order sa mga enforcer.
Dugang pa sa opisyal, tumong sa ilang buhatan nga mapalig-on ang kampanya batok sa mga sakyanang walay rehistro, mga driver nga walay balidong lisensya, ug uban pang paglapas sa RA 4136 kon Land Transportation and Traffic Code of the Philippines.
