Nagpagawas ang City Government of Bislig pinaagi sa Bislig City Disaster Risk Reduction and Management Office (CDRRMO) og Situational Report sa Disaster Response Operations Monitoring and Information Center (DROMIC) alas 3:00 sa hapon, Pebrero 21, 2026, human sa padayon nga kusog nga pag-ulan tungod sa shear line ug wind convergence nga nakaapekto sa daghang barangay sa Bislig City.
Sumala sa report, mokabat sa 23,651 ka pamilya o 91,087 ka indibidwal gikan sa 22 ka barangay ang naapektuhan sa pagbaha, ilabi na sa mga ubos nga lugar ug komunidad nga duol sa suba. Gikan niini, 1,251 ka pamilya o 4,214 ka indibidwal ang temporaryong nibakwit sa ilang panimalay ug gihatagan og tabang pinaagi sa evacuation ug response operations.
Ang mga barangay nga adunay pinakadaghang apektadong populasyon mao ang:
Mangagoy – 5,260 ka pamilya (20,750 ka indibidwal)
Tabon – 3,719 ka pamilya (14,526 ka indibidwal)
Poblacion – 3,216 ka pamilya (12,858 ka indibidwal)
Lakip usab sa mga naapektuhan nga lugar ang San Roque, San Jose, Comawas, Mone, San Isidro, Pamaypayan, Burboanan, Labisma, Lawigan, San Antonio, Pamantinan, Tumanan, Bucto, Caguyao, Santa Cruz, San Fernando, Sibaroy, ug San Vicente.
Base sa inisyal nga Rapid Damage Assessment and Needs Analysis (RDANA), adunay duha (2) ka balay nga partially damaged ug usa (1) ka balay nga totally damaged. Wala usab natala nga namatay, nasamdan, o missing nga indibidwal.
Sa pagkakaron, pagpadayon ang lokal nga panggamhanan sa pagpakigkoordinar sa mga opisyal sa barangay aron masiguro ang kaluwasan ug kaayohan sa komunidad samtang gibantayan ang kahimtangan sa panahon alang sa posibleng pag-uswag sa maong report.
Gipahimangnoan ang publiko nga magpabiling alerto ug sundon ang mga pahibalo gikan sa lokal nga awtoridad, ilabi na sa mga lugar nga delikado sa baha ug landslide.
