Kapin sa 60,000 ka pamilya sa Rehiyon sa Caraga Region ang naapektuhan tungod sa shear line nga nagdala og padayon ug kusog nga pag-ulan sa nagkadaiyang lugar sa rehiyon.
Base sa pinakaulahi nga datos sa Regional Disaster Risk Reduction and Management Council Caraga o RDRRMC Caraga, miabot na sa 60,680 ka pamilya o katumbas sa 257,243 ka indibidwal ang naapektuhan sa epekto sa pagbaha ug pagdahili sa yuta.
Gikan niini, 6,607 ka pamilya o 21,604 ka indibidwal ang kasamtangang nagpabilin sa 82 ka evacuation centers, samtang kapin sa 9,000 ka pamilya ang nakigsilong sa ilang mga paryente ug higala.
Sa laing bahin, 16,219 ka pamilya o 57,213 ka katawhan ang direktang naapektuhan sa mga insidente sa pagbaha ug landslide.
Gipadayag usab sa RDRRMC Caraga nga adunay 32 ka kabalayan ang nadaot tungod sa baha ug pagguho sa yuta. Sa maong ihap, walo ang totally damaged samtang 24 ang partially damaged.
Natala usab ang 16 ka landslide incidents, diin siyam niini ang nahitabo sa Agusan del Sur ug duha sa Surigao del Sur.
Grabe usab ang pagbaha nga naobserbahan sa 68 ka barangay, 31 sa Agusan del Sur, 32 sa Surigao del Sur, upat sa Butuan City ug usa sa Surigao del Norte.
Padayon ang monitoring sa mga lokal nga otoridad samtang ginahangyo ang publiko nga magpabiling alerto ug mosunod sa mga pahimangno sa lokal nga panggamhanan ug disaster response agencies.
Photo Courtesy: Province of Surigao del Sur
