Gipalig-on sa City Government of Malaybalay (CGM), pinaagi sa City Agriculture Office (CAgO), ang suporta niini sa sektor sa agrikultura human gipang apod-apod ang 5,252 ka sako nga 14-14-14 inorganic fertilizer ngadto sa mga mag-uuma sa mais sa 37 ka barangay sa syudad.
Ang pag-withdraw sa abono gipahigayon niaging adlaw ug nagpadayon kini hangtod mahatagan tanang mga kwalipikadong mag-uuma, isip kabahin sa implementasyon sa 2025 City Agricultural and Fishery Production Support Projects.
Sumala ni Engr. Richard Leoano ang City Agriculturist sa Malaybalay City Agriculture Office, sa maong sistema, ang mga farmers nakadawat na sa miaging tuig, dili sa una maapil aron matagaan pud ang uban, kung diin 10 ka kilos nga corn seed ug usa ka sako nga complete fertilizer ang madawat nga igo na matanom sa tunga ka ektarya.
Gipasabot usab niya nga kini tabang sa LGU, dili pasabot nga tanan gasto sa produksyon tubagon na sa gobyerno tungod kay limitado usab ang resources. Apan pinaagi ani nga ayuda, makunhuran bisan gamay ang production cost sa mga mag-uuma.
Ang fertilizer support kabahin sa mas lapad nga programa sa mais production nga mosuporta sa una nang gipanghatag nga hybrid corn seeds aron mapataas ang ani kada ektarya ug mapalig-on ang kinatibuk-ang produksyon sa mais sa dakbayan.
Pinaagi sa inisyatiba, gilauman sa lokal nga panggamhanan nga mosaka ang produksyon sa mais, masiguro ang food sufficiency, ug mapalambo ang malungtarong panginabuhi sa mga mag-uuma sa Malaybalay City
Photo Courtesy: CITY AGRICULTURE OFFICE MALAYBALAY
