Gipaspasan karon sa Department of Public Works and Highways (DPWH) Surigao del Sur Engineering District ang pagpadala sa mga gikinahanglang report ngadto sa ilang National Office aron masiguro ang dinaliang pundo alang sa pag-ayo sa mga nagubang imprastraktura sa probinsya.
Sumala ni Engineer Miller Pagaran, ang Operation Engineer sa DPWH-SDS, gihimo nilang prayoridad ang pagsumite sa maong mga dokumento tungod kay ang mga naguba nga dalan ubos sa kategorya sa National Road. Pasabot ni Pagaran nga kinahanglan ang paspas nga koordinasyon sa nasudnong kagamhanan aron mahatagan dayon og igong budget ang maong mga damyos.
Giangkon sa opisyal nga limitado lamang ang pundo nga anaa sa ilang buhatan karon, hinungdan nga naniguro sila nga mapahibalo dayon ang kaulohan aron masugdan ang rehabilitasyon.
Usa sa mga dapit nga gihatagan og dinaliang pagtagad mao ang National Road gikan sa Nurcia Bridge paingon sa Crossing Cortes. Sa pagkakaron, dili pa gihapon maagian sa mga dagkong sakyanan ang maong dalan, butang nga giingong nanginahanglan og dinaliang aksyon aron mabalik ang normal nga dagan sa transportasyon sa Surigao del Sur.
